HIALA DIA HO AIZA?

août 10, 2018

« Hianareo koa va mba te hiala? » Jaona 6: 67

Teny nataon’i Jesosy tamin’ny mpianatra roa ambin’ny folo lahy io teny io rehefa maro tamin’izy ireo no nihemotra, tsy niara-nandeha taminy intsony, tena niala. Inona no antony nampiala azy ireo? Tsy nahazaka ny teny nataon’i Jesosy. Anefa dia teny nanambaràn’i Jesosy ny tenany ho Ilay mofo nidina avy any an-danitra ka izay mihinana Azy no manana ny fiainana. Ny mofo dia ny nofony. Hoy ireo mpianatra: Sarotra izany. Iza no mahahaino izany? Efa tena nanara-dia an’i Jesosy anefa ireo mpianatra ireo no tsy mahazaka izao teny izao. Manahoana ny fihainoantsika ny tenin’Andriamanitra. Ny hitan’i Jaona ao amin’ny bokin’ny Apokalypsy dia Jesosy misy sabatra roa lela mivoaka avy eo amin’ny vavany. Tenin’Andriamanitra anefa io sabatra roa lela io. Tsy zakan’ny olona ny voatsindron’izany. Voalaza aza fa manindrona hatramin’ny fampisarahana ny aina sy ny fanahy ary ny tonona sy ny tsoka mihintsy. Marary ny voatsindrony kanefa izany no manasitrana antsika. Koa raha mandre ny tenin’Andriamanitra isika, te hiala sa te ho sitrana? Aoka isika hanaiky ho sitranina. Amen.
Jesosy Kristy Tompo mampahery anao

FEON’NY FILAZANTSARA
‘Manambara an’i Kristy amin’ny firenena … ary mitarika ny firenena ho ao amin’ny Fiangonana’
Tél:
22 210 42
034 20 635 53
032 54 635 53
033 15 635 53
E-mail : lhmmada@gmail.com
Site Web: http://www.feonyfilazantsara.org
Facebook: Feon’ny Filazantsara

Raha nanohina anao ity toriteny ity na misy fanamarihana manokana tianao hatao dia tsindrio ny “leave a comment” eto ambany, avy eo manorata eo amin’ny “enter your comment here”. Misaotra betsaka.
Publicités